fimmtudagur, 24. apríl 2008

Pólitísk fötlun.

Pólitík getur verið lamandi. Ég berst sjálfur við það að detta ekki í það að tengja allt og alla við pólitík. Gengur misvel. Nú lifum við tíma þar sem mörgum finnst öllu til fórnandi til að reyna að koma pólitísku höggi á menn.

Bloggarar þar á meðal. Hver á fætur öðrum hamast nú við að nota eðlilegar aðgerðir lögreglunnar gegn skríl sem hefur talið sig starfa í nafni þjóðarinnar sem tæki til að koma höggi á Björn Bjarnason.

Þegar kemur að pólitískri rétthugsun er bara allt leyfilegt. Hvaða máli skiptir það þá að grafa undan lögreglunni? Auka á virðingarleysið. Kannski endar þessi leikur með því að við þurfum ekki lengur að flytja inn fólk sem misþyrmir lögreglunni.

Pólitíkin getur verið lamandi og ég reyni eftir fremsta megni að vera á varðbergi gangvart sjálfum mér. Ef ég sofna á verðinum gæti ég endað eins og Jónas Kristjánsson! Og margir fleiri reyndar, og sumir allajafna öndvegis, en þegar kemur að helv.. pólitíkinni þá fer allt úr skorðum.

Röggi.

DV að gefast upp?

Nú fer væntanlega að styttast í að útgefendur DV gefist upp. Það kæmi mér vissulega ekki á óvart. Veit ekki hver kaupir blaðið og eins og staðan er orðin núna þá þurfa menn ekki lengur að eiga svona fjölmiðil.

Nú fæst blaðið ekki lengur í sjoppunni minni. Þar er linnulitil traffík en nú þykir ekki lengur svara kostnaði að aka blaðinu þangað af því að ekki seljast fleiri en 10 eintök.

Fyrstu merki þess að endirinn sé í augsýn...

Röggi.

miðvikudagur, 23. apríl 2008

Lögreglan loks farin að sinna skyldum sínum.

Hvernig gat þetta endað öðruvísi spyr ég? Menn með einbeittan brotavilja hljóta á endanum að verða teknir úr umferð. Allt annað er lögleysa. Vörubílstjórar eða pólverjar, allir búa hér við sömu löggjöf og ber skylda til þess að hlýða fyrirmælum lögreglu. Þeir sem ekki sjá þetta grundvallaratriði eru í mínum huga á rangri leið.

Hvaða hvatir eru það hjá fólki sem grýtir grjóti í annað fólk? Að ég tali nú ekki um lögreglu sem er í fullum rétti við að halda hér upp lögum og reglu. Hver getur varið svona framkomu?

Enginn auðvitað en fjölmargir telja samt að þessi lögbrjótar og nú ofbeldismenn hafi svo góðan málsstað að þetta sé rétt mátulegt á þessa andskota. Sem eru þá væntanlega, lögregla, olíufélög og stjórnvöld.

Ég fagna eindregið því að lögreglan hafi nú ákveðið að sinna skyldum sínum og stöðva þessa ósvinnu. Í okkar þjóðfélagi er fullt málfrelsi og tjáningar. Hver einasti þegn getur komið skoðunum sínum á framfæri á alla hugsanlega vegu. Þeir sem af einhverjum ástæðum telja sig þurfa að brjóta lög í leiðinni eiga að mínum dómi að svara til saka fyrir það.

Nú reynir á styrk stjórnmálamanna. Ekki er vafi í mínum huga að nú rjúka upp til handa og fóta grútslappir pólitíkusar sem gagnrýna lögregluna og framgöngu hennar. Populistar sem ekki geta eða þora að sjá stóru myndina. Því miður nær það fólk alltof oft eyrum almennings og það sem verra er, fjölmiðlamanna.

Hvernig væri nú að taka vörubílstjórana út úr jöfnunni og líka málsstaðinn þeirra, sem snýst auðvitað ekki um bensínverð, og setja í staðinn pólverja eða lítháa með einhvern málsstað sem þeir telja heilagan og hafin yfir guð og aðra. Ekki spurning að þá vildi almenningur setja stopp og beita til þess nauðsynlegri hörku.

Það er mergurinn málsins. Lögbrot ber að stöðva og ítrekuð skipulögð lögbrot ekki síst. Óháð því hver fremur þau og hvað viðkomandi segist vilja hafa sem málstað þegar lög eru sniðgengin.

Hver skilur þetta ekki?

Röggi.

sunnudagur, 20. apríl 2008

Orðdólgurinn jonas.

Ég var búinn að gleyma Jónasi Kristjánssyni. Magnað alveg því maðurinn er ógleymanlegur. Síðustu ár hans sem ritstjóra DV verða lengi í minnum höfð, hélt ég. Lágkúran sem hann birti í blaði sínu nánast daglega var þannig að menn trúðu vart eigin augum.

Hann var látinn hætta því. Dró sig í hlé, löngu verðskuldað hlé og fór á hestbak held ég,. Heldur snautleg burtreið gamla meistarans. Ég fann ekki fyrir söknuði.

Og nú bloggar hann af mikilli innlifun. Bloggarinn jonas er bitur maður og reiður og man aldrei eftir neinu jákvæðu. Hann er sérfróður sem aldrei fyrr og hann er líka orðljótur og stóryrtur. Hálfgerður orðdóni.

En hann er lesinn öfugt við það sem gerðist síðast þegar hann hafði lifibrauð sitt af því að skrifa. Ætli það sé vegna þess sem hann er að reyna að koma til skila eða vegna stóryrðanna sem hann velur frekar en ekki?

Umbúðir umfram innihald. Okkur lesendum er að fara aftur því ekki hefur jonasi farið neitt fram.

Röggi.

laugardagur, 19. apríl 2008

Lögfræði Lúðvík bæjó.

Skrifaði um þetta um daginn og geri það aftur núna. Samkeppnistofnun hefur komist að þeirri niðurstöðu að kaup OR á hlut hafnarfjarðarbæjar í HS sé ólöglegur gjörningur. Hef ekki kynnt mér þennan úrskurð en geng barasta út frá því að hann sé eðlilegur.

Bæjarstjórinn minn hann Lúðvik Geirsson hefur nefnilega tjáð sig um þetta mál fyrir nokkru. Þar tók hann afdráttarlaust þá afstöðu að honum kæmi úrskurður samkeppnisstofnunar hreint ekkert við. Hann væri með kaupsamning þar sem ekki væru fyrirvarar um úrskurð þessarar stofnunar. Síðast þegar ég tjáði mig um þessa heimspeki þótti mér hún á jaðri siðferðis.

Barnalegt hjá mér að halda að svoleiðis leiðindi vegi þungt í afstöðu stjórnmálamanns. Hætti því að hugsa um það en velti því fyrir mér hvurskonar lögfræði það er sem skyldar menn til að standa við samning sem klárlega þarf að fá úrskurð samkeppnisyfirvalda sem kemst svo að þeirri niðurstöðu að téðjur samningur sé ólöglegur.

Lúðvík vill fá aurinn og það get ég skilið en eitthvað er stórlega bogið við systemið ef OR verður að borga honum fyrir eitthvað sem ekki fæst keypt. Forsendubreytingar, skipta þær engu? Er það bara skylda kaupanda að samningur sé vel og löglega úr garði gerður?

Það er svo margt sem ég ekki skil.

Röggi.

föstudagur, 18. apríl 2008

Útlendingaraus.

Er ekki stórhættulegt að skrifa um útlendinga? Og hið meinta vandamál sem þeim fylgir. Hér opnar enginn munninn nema Jón Magnússon en hann segir það sem fjandi margir hugsa í þessum efnum. Ætti kannski að hætta hér svo ég eigi ekki yfir höfði mér málshöfðum fyrir dómstóli götunnar.

Fyrir þeim dómstól tapa hinir ákærðu ávallt og alltaf án þess að geta borið hönd fyrir höfuð sér. Hver vill dæmast til hæstu refsingar; annað hvort frjálslyndur eða rasisti nema hvoru tveggja sé.

Það er bara þannig hvort sem mér líkar það betur eða verr að mjög mörgum er orðið illa við útlendinga og þó sér i lagi Litháa og Pólverja. Svörtu sauðirnir úr þeim hópi virðast svartari en við eigum að venjast frá öðrum. Það er ömurlegt fyrir allt það góða fólk frá þesum löndum sem hér býr.

Schengen tryggir okkur að við getum illa fylgst með því hvort hingað koma misyndismenn í hópum til illra verka. Veit ekki mikið um landamæravörslu þannig séð en það veitir mér talsvert öryggi að vita til þess að fylgst er garnnt með því hvort leikfimifólk frá Kína eða stripparar séu að dandalast hingað okkur til ama.

Á meðan árvökulir verðirnir hafa ekki augun af listdönsurum frá austur evrópu labba hingað til lands að mér virðist að mestu óáreyttir ótýndir glæpamenn sem hefja fljótlega blómlegan rekstur og laganna verðir horfa svo bara á og ætlast til þess að þeir leysi sín mál sjálfir.

Veit að þetta er einföldun en ég er ekki einn um að skilja hvorki upp né niður í þessu. Er ekki eitthvað bogið við þetta hjá okkur?

Við kannski stefnum í að verða það sem félagi Shirinovsky lagði til um árið.....

Hvað var það nú aftur?

Röggi.

Illa launuð flugstörf.

Hvernig má það gerast aftur og aftur að starfsfólk í flugbransanum getur ekki samið við vinnuveitendur sína öðruvísi enn með látum? Gríðarlega eftirsóknarverð störf og fram til þessa hef ég haldið og heyrt að þau séu vel launuð. Launin fæla allavega ekki nokkurn mann, eða konu, frá svo mikið er víst.

Þessar starfstéttir eru eiginlega þær einu sem nýta sér verkfallsréttinn til gagns. Enda finnur ferðaóð þjóðin fyrir því ef flugmenn vanhaldnir í launum ákveða skyndilega að vinna samkvæmt kjarasamningi sínum. Það gera þeir eins og kunnugt er helst ekki nema þeir séu þvingaðir til þess af ósveigjanlegurm vinnuveitendum! Hver skilur svona system?

Svoleiðis kalla þeir reyndar ekki aðgerðir. Þó er það þannig að þetta undarlega háttarlag þeirra setur allt úr skorðum. Þetta nægir venjulega til þess að þeir fá óskir sínar að mestu uppfylltar. Þá taka þeir að sjálfsögðu til við að vinna eftir gamla kerfinu sem er ekki samkvæmt kjarasamningi þeirra! Hjálp.

Þeir nefnilega standa ekki bakvaktir nema þeir séu ánægðir. Þegar þeir verða óánægðir með kjör sín er bakvakta fyrirkomulagið ómanneskjulegt og slítandi. Samt vita það allir er það ekki að ekki er hægt að reka flugfélög án þessa kerfis.

Auðvitað er ekki hægt að kenna einum um þegar tveir deila. Mér er þó enn í fersku minni fyrr í vetur þegar flugmenn neituðu að fá félagsdóm til að úrskurða um ágreining þeirra vegna kjarasamnings þeirra við Icelandair. það var kostuleg uppákoma sem í mínum huga veikti þeirra málatilbúnað allan verulega.

Flugfreyjur eru líka óánægðar. Þó vilja allir vinna þau störf líka, enda alkunna að þau störf þykja vel launuð og fríðindi talsverð. Stefnir í verkfall. Þá man ég skyndilega eftir árvissri ólund flugumferðastjóra með sín kjör. Flestum þykja laun þeirra skítsæmilega samanburðarhæf við önnur.

En þessum stéttum dugar þó að jafnaði ekki þær kjarabætur sem bjóðast almennt. Hvurslags er það.

Röggi.

Sérfræði Gunnars Smára.

Menn sem ég ber virðingu fyrir segja mér að Gunnar Smári sé frábær fagmaður. Frjór, skemmtilegur og endalaus uppspretta hugmynda. Þessu trúi ég vel og auk þess er hann á góðum degi stórskemmtilegur.

Breytir þó ekki því að ég get með engu móti skilið hvað Jón Ásgeir fær út úr því að hafa hann í fullri vinnu árum saman við að tapa peningum. Man í svipinn ekki eftir neinu sem hann hefur komið nálægt sem hefur gengið upp.

Hann er nánast orðinn sérhæfður í því hvernig hægt er að gefa út blöð sem enginn vill lesa eða kaupa. Að visu tókst honum eftir að hafa sett Fréttablaðið á hausinn einu sinni að fá menn til liðs við sig sem gátu bæði gefið blaðið út og auglýst í því líka. Það er viss snilld.

Þá var honum spyrnt upp og gerður að stjóra. Það gékk ekki upp hann var þá sendur til Danmerkur til þess að tapa fé á rekstri fríblaðs. Það gékk auðvitað ekki enda ekki vitað til þess að vinnuveitendur Gunnars eigi nógu mikið af fyrirtækjum í Danmörku til þess að halda út auglýsingum í heilu blaði. Þaðan lá svo leiðin til Ameríku í sömu erindagjörðum og ég sé ekki betur í blöðum núna en að það ævintýri sé nú á enda, væntanlega með skelli. Nenni ekki að tala um NFS...

Hvenær er fullreynt? Svo birtist maðurinn í spjallþáttum sérfróður um efnhagsmál. Merkilegt alveg.

Röggi.

Hvert fer hæfasta fólkið?

Gamla klisjan segir að besta fólkið vinni ekki hjá hinu opinbera. Það hljómar ekki nógu vel fyrir allt það fína fólk sem vinnur þar. Allt um það, margir trúa þessu.

Bestu skólar heimsins eru ekki ríkisreknir né heldur öflugustu sjúkarhúsin. Ekki endilega vegna þess að þar vinni vont fólk heldur miklu frekar vegna þess að opinberir aðilar eru að mínu viti vondir vinnuveitendur, oft. Eru ekki samkeppnisfærir í launum og kjörum almennt.

Þess vegna vinna "allir " hjá bönkum núna. þar er vel gert við fólk í flestu og sóst eftir hæfileikamesta fólkinu, stundum með bægslagangi og yfirboðum. Þau fyrirtæki sem dragst aftur úr og keppa ekki verða einfaldlega að sætta sig við það sem af gengur. Lögmál markaðarins.

Getur verið að þetta sé farið að hafa verulega áhrif á það hvaða fólk gefur sig að stjórnmálum? Fáum við kannski ekki lengur hæft fólk til að vinna þau störf. Hefði Davíð kannski orðið lögfræðingur kaupþings ef hann væri að hefja störf núna?

Þurfum við ekki að gera eitthvað til þess að gera þessi mikilvægustu störf landsins eftirsóknarverð fyrir okkar besta fólk? Hækka launin til dæmis. Þá fer reyndar af stað kór mikill sem telur að þessi starfsstétt þurfi helst að vera láglauna.

Hér á landi gæti forsætisráðherra verið messagutti hjá hinum og þessum millistjórnendum í bönkunum.

það er brandari.

Röggi.

fimmtudagur, 17. apríl 2008

Kjörþokki.

Ég skil hvorki upp né niður í kjörþokka. Veit ekki til þess að hann sé einhversstaðar skilgreindur nákvæmlega. Örugglega mikið af fólki sem ætti erindi í pólitík en annað hvort getur ekki eða nennir ekki að reyna að koma sér upp kjörþokka.

Ég er ekki einn af þeim sem trúi því að leiksýningarnar sem settar eru upp í fjölmiðlum daglega skipti öllu þegar kemur að daglegum störfum stjórnmálamanna. Þing og sveitastjórnir eru án vafa skipuð fólki sem vinnur mikla vinnu en að mestu ósýnilega. Svo koma flassararnir og stela senunni fyrir framan myndavélarnar. Laun heimsins eru stundum vanþakklæti.

Þetta er ég að hugsa þegar ég hugsa um Kjartan Magnússon. Hann er í mínu liði en ég hef samt aldrei skilið í hverju hans kjörþokki liggur. Hann kemur vel út úr prófkjörum aftur og aftur svo ekki er með góðu hægt að halda því fram að hann beiti klíkuskap eða trixum.

Hann hefur einhvernveginn verið þarna allan tímann en samt ekki. Hefur tekist að sigla lygnan sjó án þess að styggja neinn innan dyra eða utan. Forðast átök og verið í bakgrunni. Þetta er allt gott og blessað þannig séð. Allverulega óspennandi en skynsamlegt.

Séerstaklega fyrir fólk sem hefur mikinn metnað til þess að gera pólitík að ævistarfi. Fyrir mér hefur hann alltaf verið atvinnumaður í faginu. Gæti varla stunið upp úr mér fyrir hvað hann stendur nákvæmlega. Örugglega þó almenn gildi og góð en reynir þó að sníða þau þannig að þau henti flestum og skipi honum ekki í neinar fylkingar. Það er óhollt til lengdar, segja þeir.

Þegar þetta tekst vel þá gerist það, eftir nógu margar kosningar, að viðkomandi hefur óhjákvæmilega færst ofar í goggunarröðina. Röðin er einfaldlega komin að honum. Þetta sjáum við oft í flokkunum öllum. Þá skiptir hæfi miklu minna máli en reynsla.

Núna hef ég á tilfinningunni að Kjartan sé kominn í stöðu sem hann hvorki kann né nýtur þess að vera í. Nú er hann kominn svo framarlega í röðinni að hann nýtur ekki skjóls lengur. Ábyrgð orða hans og skoðana hefur stóraukist. Grunar að lífið hafi verið honum betra þegar hann var bara "óbreyttur" en ekki aðal eins og hann virðist vera í dag.

Guðfaðir nýja misheppnaða meirihlutans og nefndakóngur. Situr uppi með REI ruglið sem enginn skilur. Meira að segja strigakjafturinn Svandís þoldi ekki það mál, og hvað þá Kjartan sem virðist laus við karisma.

Við sjálfstæðismenn virðumst hafa gleymt okkur í endurnýjuninni. Leiðtogar okkar í borginni eru nákvæmlega sama merkinu brenndir. Þeir hafa beðið nógu lengi og lifað nógu oft af til þess að röðin kæmi að þeim.

Villi lifði af ótrúlega marga leiðtoga áður en hann kom til greina. Maður gékk undir manns hönd til þess að galdra utanaðkomandi að árum saman. Engum datt í hug að Villi væri maðurinn. Og líklega enn færri sem sáu leiðtoga í Kjartani.

En kannski hef ég fullkomlega rangt fyrir mér. Kannski er Kjartan akkúrat dæmið um manninn sem hafði það ekki í sér að trana sér fram en er samt afbragðs liðsmaður. Vonandi en á þessari stundu finnst mér fátt benda til þess.

Verst að ég fæ ekki að kjósa í Reykjavík. Ef fram fer sem horfir mun okkur ekki veita af öllu okkar næst þegar gengið verður til kosninga.

Okkur snarvantar fólk með kjörþokka. Og eitthvað á bak við hann líka.

Röggi.

miðvikudagur, 16. apríl 2008

Körfubolti er fyrir alla.

Bara ef ské kynni að einhver væri að missa af því þá bendi ég áhugafólki um hámenningu og skemmtun að úrslitakeppnin í körfubolta er að ná hámarki. Þeir sem héldu að ekki yrði betur gert en í fyrra höfðu sem betur fer alrangt fyrir sér. Kofarnir stútfullir og stemningin ólýsanleg. Gæði leikjanna í raun ótrúleg. Frábær umgjörð bragðbætir svo.

Ef við Íslendingar erum eins og allur meginþorri Evrópubúa þá styttist í körfubolti verði langstærsta inniíþrótt okkar. Á meðan handboltinn þjáist blómstrar karfan sem aldrei fyrr. Ef ekki væri fyrir það að við eigum heimsklassalandslið í handbolta sem fær aðgang að öllum stórmótum á háls árs fresti eftir að hafa unnið Makedoniu í tveimur leikjum væri handboltinn hér í alvarlegri útrýmingarhættu.

Hef ekki áhyggjur af því enda mómentið algerlega með körfunni. Og skyldi engan undra. Forysta KKÍ hefur hugsað langt og hægt en ekki stutt og hratt eins og algengt er hérlendis. Markviss uppbygging til lengri tíma er það sem skiptir máli og traustar undirstöður.

Mörgum fannst ekki takast nógu vel til að vinna úr NBA sprengjunni sem hér varð um árið. Það er misskilningur því við erum að sjá langtímaáhrif þeirra sprengju þessi misserin.

Við höfum verið lánsöm með forystumenn fyrr og nú. Ævintýramennska í fjármálum óþekkt og stundum hafa menn þurft að taka sársaukafullar ákvarðanir til þess að halda sjó í þeim efnum. Aldrei hefur staðið til að gleypa heiminn í einum bita. Þeir sem nú stýra skútunni eru akkaúrat réttir menn og konur á réttum stað.

Fjölmiðlar sífellt að verða betur og betur með á nótunum og enginn kemst hjá því að hrífast með. Mæli eindregið með því allir sem vettlingi geta valdið drífi sig á leik því ódýrari skemmtun og hollari er ekki að fá.

Við erum rétt að byrja.

Röggi.

Málgagn morðingja.

Þeir eru sýnu merkilegri morðingjarnir ef þeir eru pólskir. Ekki er verra ef þeir hafa framið hrottaleg morð með áhöldum sem að jafnaði eru notuð við kornuppskeru.

Fjölmiðlar, sér í lagi DV, eru undirlagðir umfjöllun um tvo misyndismenn pólskrar ættar sem hafa nú fundið sér málgagn þar sem þeir bera hvern annan sökum. DV er greinilega búið að taka afstöðu í málinu og hefur ákveðið að halda með öðrum aðilanum.

Ekki þekki ég sannleikann í þessu máli en ætla að leyfa mér að halda að ekki sé til einn sannleikur í þessum farsa. Hversdagslegt fólk eins og ég kemst í gegnum lífið án þess að lenda í útistöðum við sveðjumorðingja og annað hyski af þeim toga. Enda aldrei verið í glæpabransanum.

Afleitt þegar morðingjum sinnast svona. Veit ekki hvort gerandi er grín að þessu því svona gaurar koma óorði á allt sem pólskt er hér og það hlýtur að vera erfitt fyrir yfirburðameirihluta þeirra pólverja sem hingað hafa komið í eðlilegum tilgangi.

Fólk sem aldrei hefur tilheyrt, eða vera boðið að tlheyra, glæpaklíkum. Þekkir ekki glæpamenn og síðast en ekki síst, hefur aldrei myrt nokkurn mann.

Og aldrei haft varnarþing á síðum DV.

Röggi.

fimmtudagur, 10. apríl 2008

Sturla býr í bananalýðveldi.

Þreytist ekki á að tala um talsmann vörubílstjóra. þekki þann fína mann ekki neitt en finnst framganga hans vera svo kristaltært dæmi um það þegar menn snúa hugtökum á haus að ég stenst ekki mátið.

Málsstaður hans virðist svo veikur núna að hann ákveður að draga málið niður í pólitík og atar forsætisráðherra auri þegar hann er beðinn um að gefa skýrslu hjá lögreglu vegna meintra lögbrota sem hann reyndar kannast ekki við núna. Öðruvísi var það reyndar þegar hann stóð keikur í stafni á vetfangi mótmælanna.

Þetta er þekkt og þróuð aðferð því baugsmenn fluttu hana inn og þróuðu. Þegar um allt þrýtur er best að kenna stjórnmálamönnum bara um. Það verður alltaf vinsælt. Sturla Jónsson á bara að svara fyrir sig eins og aðrir þegnar þessa þjóðfélags. Hann er varla undanþeginn landslögum. Það þarf engan forsætisráðherra til þess að krefja hann um skýringar á athæfi sínu. Lögreglunni ber að gera það. Sýnist stuðningurinn mikli sem þessir menn fengu tímabundið hafa ruglað þá í ríminu.

Sturla talar um að hann búi í bananalýðveldi. Það má vel vera rétt hjá honum. Vandinn er að hann skilur greinilega ekki hver er bananinn í þessu lýðveldi.

Röggi.

Möller.

það er greinilega ekki tekið út með sitjandi sældinni að vera ráðherra samgöngmála. Man ekki eftir neinum í svipinn sem almenn sátt var um. Enda hvernig á að vera hægt að gera nógu vel? Í Kristjáni Möller fengu menn það sem þeir báðu um.

Nú kemur stjórnandstöðu blaðrið hans illa í bakið á honum. Hann hefur alltaf verið hagsmunapotari af gamla skólanum. Stundum orðhákur og þegar verst hefur staðið á hjá honum í gengum tíðina stóryrtur í garð þeirra sem vilja samgöngubætur á höfuðborgarsvæðinu. það kallaði hann gjarnan að menn hefðu ekki skilning á þörfum landsbyggðar eða að menn væru haldnir andúð á landsbyggðinni.

Hef ekki haft heilsu í að setja mig inn í hvaða stefnu málefni sundabrautar eru að taka undir hans forystu. Kallinn virðist stefnulaus og reikandi þegar kemur að því að framkvæma en kraftmikill þegar kemur að því að gagnrýna menn. Hver man ekki frumhlaupi hans þegar hann gerði tilraun til að eyðileggja heiður og starfsæru verkfræðings í ferju skandalnum?

Nú eru hann og vegamálastjóri ropandi óánægðir með að fólk keyri hvert annað niður ótt og títt á vegum sem eru ýmist í viðgerð eða byggingu. Ekki er langt síðan að banaslys varð við vegaframkvæmdir í garðabæ vegna ónógra merkinga.

Þá litu þessir menn það alvarlegum augum og nú skyldi bætt úr. Þessi sömu alvarlegu augu líta nú á hvert slysið við Voga afleggjarann. Vegamálstjóri var að ýja að því að þeir yrðu að fara að lögum í þesum efnum. Hvaða lög eru það sem banna traustar merkingar á vinnusvæðum? Fatta þetta ekki.

En kannski batnar Möller og lærir. Skyldi samt ekki af hverju hann fékk stólinn í upphafi. Líklega bara til þess að stoppa tuðið, gamalt trix að gera slagsmálahundinn að lögreglumanni.

Hér virðist trixið ekki vera að gera sig.

Röggi.

miðvikudagur, 9. apríl 2008

Geta lögbrot verið heimil?

Þá er loksins búið að taka skýrslu af umferðardónanum Sturlu Jónssyni. Les það að hann geti ef allt fer á versta veg átt von á fangelsi. Óska engum fangelsisvistar en þetta var viðbúið.

Samt finnst mér ótrúlega margir vilja bara gefa honum upp sakir. Losa hann undan landslögum sem þó nýttust svo vel þegar kárahnjúkum var mótmælt með ólöglegum hætti. Og gegn leikfimifólkinufrá Kína sem var handsamað og læst í skólahúsinu.

Get ekki skilið af hverju fólk sér ekki hvaða fordæmi er gefið ef einum er leyft að brjóta lög bara af því að hann er góður gæi með fínan málsstað. Grunar að margir taki afstöðu til þessa máls út frá áunninni andúð á stjórnvöldum og valdboði.

"Látum þessa andskota heyra það, loksins birtist einhver sem þorir að bjóða þessum köllum byrginn". Allt gott og blessað, þangað til lög er brotin. Flóknara er þetta nú ekki.

Ef allt er rétt hjá okkur er enginn undanþeginn lögum. Hvorki háir eða lágir. Um það hljótum við að verða að vera sammála.

Röggi.

þriðjudagur, 8. apríl 2008

Öfgar Árna Finnssonar.

Árni Finnsson skammast í Agli Helgasyni vegna þess að hann vogar sér að taka ekki möglunarlaust undir heimsendaspár snillingsins Al Gore. Kallar hann loddara. Árni Finnsson er skilgetið afkvæmi umhverfisverndar iðnaðarins og nánast orðinn vanhæfur til að fjalla hlutlaust um málefnið.

Hann kallar það hægri öfga að efast. Frá mínum bæjardyrum séð er það nánast fötlun að tapa hæfileikanum til að efast og halda áfram að spyrja spurninga. Al Gore notar sömu aðferðir og öfga prestar í sjónvarpi þar vestra. Þeir sem efast skulu til fjandans. Hvenær fékk Al Gore úrskurðarétt í málinu? Skolaði hann ekki bara á fjörur umhverfisbransans þegar hann hröklaðist við hlátrasköll úr stjórnmálum?

Virðingarleysi Árna fyrir öðrum skoðunum en sínum kristallast hér vel. Mér í sjálfu sér alveg sama hvort öfgarnir hans liggja til hægri eða vinstri. Hann er öfgamaður sem hefur fundið sannleikann eina og þeir sem ekki sjá það sama og hann eru dæmdir menn.

það er fólk eins og Árni sem stendur málefnum umhverfis fyrir þrifum. Fólk sem vill eigna sér hlutina og draga fólk í pólitíska dilka. Ýmsir hægri menn gátu vel hugsað sér herinn burt á sinum tíma en vegna þess að hörðustu vinstri spírurnar eignuðu sér málstaðinn urðu þeir frá að hverfa.

Umhverfismál eru ekki hægri vinstri mál. Þau eru okkar allra og þess vegna væri öndvegsi að fýrar eins og Árni slepptu takinu á málinu og hættu að ata alla auri sem vilja ekki vera sömu skoðunar og kalla þá hægri öfgamenn. það er þannig meðferð á málinu sem kemur í veg fyrir eðlilega umræðu um málið og kemur í veg fyrir sátt.

Enda öfgarnir til vinstri ekki betri. Kannski öðruvísi en ekki betri.

Röggi.

mánudagur, 7. apríl 2008

Hannesarofnæmið.

Hannesarofnæmið. Vinstri menn fá almennt útbrot og ógleði þegar minnst er á Hannes Hólmstein. Hann á vitaskuld eitthvað af því skilið enda stíllinn knappur hjá honum í gegnum tíðina. Reyndar er það þannig að megnið af því sem hann hefur haldið fram alla sína tíð eru í dag almenn gildi.

Hann hefur ekki þurft að skríða í felur eða skipta um lífsskoðanir eins og margir vinstri menn þurftu að ganga gegn um, ef þeir þá gerðu það. Þetta virðist pirra marga mjög.

Nú ryðjast vinstri menn margir fram og vilja sparka í kallinn eftir klúðrið með Laxness bókina. Yfirskyn umræðunar er dómurinn en fæstir ná að halda sig við þau efnistök. Fyrr en varir snýst málið um pólitík. Vinskap við Davíð og hreina skítapólitík. þar fór fagmennskan af.

Dómurinn snýst ekki um pólitík Hannesar. Og refsingin snýr kannski mest að honum sem fræðimanni. Þá kemur að því að ekki er bráðeinfalt að refsa opinberum starfsmönnum. Það er ótækt ef ég er spurður en ekki samdi Hannes þær reglur þó hann hafi lýst sig óánægðan með þær áður.

Honum er núið það um nasir að vinna hjá hinu opinbera þó afstaða hans til opinbers reksturs sé neikvæð. Furðulegt að þrástagast á þessu enda hljóta vinstri menn og ríkissinnar að geta hugsað sér að vinna hjá einkareknum skólum. Hver vill stunda akademískt nám í algerlega einsleitu andrúmsofti, þar sem allir eru á einni skoðun? Veit reyndar um marga....

Breytum endilega reglum sem vernda opinbera starfsmenn umfram aðra menn á vinnumarkaði. Þá fengi Hannes trúlega að fjúka enda fræðimannsheiður hans nú laskaður.

En hættum skítkasti um einkahagi manna og pólitískar skoðanir eins og flestir stunda núna. Þetta mál er ekki pólitískt. Greinilegt er þó að ofnæmið fyrrnefnda auk mikils vilja til að innleiða ameríska skítapólitík sem snýst mest um persónur og þeirra einkahagi en minna um málefni er mönnum hugleikið viðfangsefni.

Röggi.

fimmtudagur, 3. apríl 2008

Einkaþotutuð.

það er eins og við manninn mælt, allt ætlar um koll að keyra vegna þess að ráðherrar tóku þann kostinn að leigja sér einkaþotu til að komast á fund erlendis. Smásálin í okkur ryðst upp á yfirborðið. Einungis viðskiptagúrúin okkar hafa leyfi til þess að ferðast með einkaþotum sem þeir fengu sér eftir sérdeilis velheppnuð viðskipti.

Af hverju er svo verið að skammast? Er það vegna þess að kostnaðurinn er of mikill? Hugsanlega en samt veit enginn hver kosnaðurinn er. Eitthvað er þetta hagstæðara í tíma sem þessa dagana er óvenju dýrkeyptur hjá þessum ráðherrum. Þá sparast dagpeningar hugsanlega...

Nei, hér finnst mér afdalamennskan ráða ríkjum. Gagnrýnendur þessarar ferðar vilja líklega líka að við byggjum allt á einni hæð, ekki uppúr jörðinni að ég tali nú um upp í loftið. Stór hluti gangrýnenda höfðu til að mynda ekkert við það að athuga að forseti lýðveldisins margnýtti sér einkaþotur nýríku businessvina sinna sér til handa og konu sinnar.

Þras um aukaatriði er sérgrein heilu hópanna hér. Dægurtuð sem ristir grunnt. Veit einhver hvað er til umræðu á fundinum?

Röggi.

miðvikudagur, 2. apríl 2008

Mótmælaofbeldi.

Jæja, þá er nýjasta afbrigðið af mótmælaofbeldi í algeymingi. Nú eru það atvinnubílstjórar sem sáu sér leik á borði þegar þeir vildu mótmæla skerðingu á ýmsum sérkjörum er snúa að þeim og hófu að andæfa háu bensínverði og slepptu hinu. Stórsnjallt, þannig séð.

Hver vill ekki borga minna fyrir bensíndropann? Málstaðurinn almennt talinn góður og þess vegna sættir meginþorrinn sig við að lög séu sniðgengin. Lögreglan allt í einu hætt að sekta fólk fyrir umferðalagabrot. Hver ákveður það og á hvaða forsendum væri gaman að vita.

Hér skiptir að sjálfsögðu engu hvort málstaðurinn sem barist er fyrir er góður eða slæmur. Lögbrot eins og að stöðva umferð skipulega er ofbeldi og á ekkert skylt við mótmæli. Mótmæli þurfa alls ekki að innihalda ofbeldi gagnvart þriðja aðila til að telast marktæk og sterk.

Þetta gætu allt eins verið Pólverjar að andæfa hugsanlegum fordómum í sinn garð. Yrði það látið viðgangast? Svarið er nei og það er ekki vegna þess að Pólverjar geti ekki haft eitthvað til síns máls. Það er vegna grundvallaratriða í okkar stjórnskipan.

Lýðskrumarar á þingi og víðar skríða nú út úr skúmaskotum sínum og vilja ná sér í hræódýrar vinsældir. Engin stýrivaxtahækkun getur bjargað hruni þess liðs. Mótmælum ef við teljum ástæðu til en ekki með ofbeldi. Íslenska ríkið tekur minna af bensíndropanum en víða annarsstaðar og það vita þingmenn og margir fleiri sem hafa ekki haft nokkurn áhuga á að hreyfa við fyrirkomulagi.

Ég mótmæli þessari aðferð og hef heyrt af því að hópur óánægðra smábíla eigenda hyggist leggja bílum sínum þannig einhvern næstu morgna að helstu talsmenn þessara aðgerða komist ekki til vinnu sínnar og lögbrota fyrr en smábílaeigendum finnst nóg komið.

Ég er ekki meðmæltur því heldur en sýnist þó að meginþorri þjóðarinnar vilji hreint endilega koma upp þannig alsherjarreglu hér að nauðsyn brjóti hiklaust lög bara ef málstaðurinn hefur nógu marga meðmælendur.

Og hver á að ákveða hvað er góður málsstaður?

Röggi.